AGUR 2016 / AUPA 2017

Kalea maite dugu, bizitzeko behar dugu; kaleak zera sortarazten digu grina, bizi-poza. Kalean jaio ginen eta, ikuskizun bakoitzean, arima zati bat bertan itzaltzen zaigu.

2016 urteak hamaika ate ireki zizkigun; esaterako, Esloveniako herriak harrera ezinhobea eskaini zigun, Donostia-San Sebastián Europako Kultur Hiriburua 2016 erakundearen bermepean antzeztu ahal izan genuen Zubideak programaren bitartez, bai eta Agüimes herriko Festival del Sur jaialdian ere; Bilbon Tonbola 0.0 (0 eraso 0 ezberdintasun) proposamena auzorik auzo eraman genuen eta, noski, plaza ezagunetako eta ezezagunetako bazterrak nahastu genituen kilometroz kilometro. Hori gutxi balitz, BasqueFest jaialdia ere hornitu genuen Anfitrioiak antzezlanarekin lur-azalean eta @Begotxudelbotxo eta haren lagun Mirentxurekin Bilboko itsasadarrean zehar eta historiaz blai. Gainera, Fitur ekitaldian irribarreak piztu genituen antzerkiaz baliatuz betiere eta, Aste Nagusiko Txikigunea eskenatoki bilakatu genuen Bilbobusa Gorri eta Alonso gidariaren eskutik. Aldi berean, etxeko eta atzerriko jaialdi, azoka edo eta kultur-ekitaldietan parte hartzeaz gain, Olentzero eta haren lagunak han-hemenka ibili ditugu Bilbora gerturatuz berriz ere, baina bai eta Abusu eta San Inazioko auzoetara ere, besteak beste. Guzti hau zorionez eta, noski, jo eta ke lan eginez. Izan ere, antzerkia deritzon honetan, lana gogor eta langile anitz…

Aro berriari dagokionez, 2017 urtea jada abian eta aukera franko eskuartean; haien artean erronka berriak, gogo-biziz badira ere. Bestalde, geure zahar-iraultza xelebrea nonahi islada dadin nahi dugu, edozein herri, hiri edo auzoetako bihotzetan FEMMES atsoak sentitu asmoz. Alabaina, protesta aitzaki, atso xarmangarri hauek umorea izango dute tresnarik baliagarriena publikoaren gozamenerako.

Honetaz gain, irribarrea eta jolasa helburu, JULE ikuskizun berria ehuntzen hastear gaude Rosa Díaz La Rous aski ezagunaren laguntzarekin. Familia osoaren onurarako izango den honetan, irudimenaren, abenturaren eta ametsen inguruan jardungo gara. Eta, aldi berean, familiarteko belaunaldi ezberdinen arteko erlazioak edo erlazio-ezak plazaratuko ditugu.

Azkenik, gaua indar haundiz berreskuratuko dugu Arriaga Antzokiarekin elkarlanean sortuko dugun ikuskizun baten eskutik; hori bai, oraingo honetan, helduei zuzendua.

Haatik, beste hainbat antzerki-ekoizpenetan nonahi murgilduko garela badakigu; indarrak piztu eta xahutzen dizkiguten horietan, alegia. Zerk edo zerk akaatuko bagaitu, izan dadila, bederen, antzerkia.

Antzerkiz jositako urtea opa dizuegu, zuek denoi.

FEMMES

Bizirik gaude, beraz, ikuskizun bizia da hau

Joan den ostiralean, Arrigorriagako Clown eta Pailazoen Nazioarteko Jaialdian, gure azken kale-lana estreinatu genuen: FEMMES.

Oraingo honetan, alde batera utzi nahi izan ditugu gure lan askotan erabili izan ditugun baliabide teknikoak eta burdinazko egiturak. Musika eta soinuzko bilgarririk gabe, ordu luzeko muntaketa-lan astunik gabe, milimetroan kubikatutako furgonetarik gabe (zenbaitetan baimendutako tara doi-doi errespetatuta) … Lau pertsona besterik ez; adinean aurrera doazen lau emakume, kalea eszenografia gisa hartuta, publikoarekin harreman hurbilak sortzea asmo duen jolasa sortzen; beti izan baikara abilak horretan. Ironia eta umorez kritikatzen dute gure ingurua, gizartea; geure buruaz barre egitea gizakiaren berezko natura baita.

Kalerik puruenera itzuli gara, gure sorlekura; bizirik eta etengabeko aldaketan murgilduta dagoen proposamen batekin gatoz, gertatzen denaren eta gertatzen ez denaren arabera eguneratuko diren ekintzekin. Jaun-andreok, jaio berri den organismo bizia da hau eta, normala denez, bere denbora-tartea behar du hazteko; horretan ari gara. Plazarik plaza, herririk herri eta hiririk hiri, baliteke hegazkina hartu eta hizkuntza ezezagun eta ulergaitzak erabiltzen dituzten lekuetara joatea; haur astunak agertuko dira zenbaitetan, zure gainean ogitartekoa jan eta bertan egon, ikusi eta parte hartu nahi duten horietakoak … eta ikuskizuna ezberdina izango da, behin eta berriro; egiazko work in progress bat.

Bizirik gaude, zorionez; lanbide hau, kale-antzerkia, gainontzeko kale-arteekin batera desegiten da gaur egun, aurrekontu pirrikoek kostu txikiko ikuskizunei ematen baitiete lehentasuna, muntaketa txikia eta jende gutxi behar duten ikuskizunei, denetarako eta guztientzako balio duten horiei. Bizirik gaude eta biziaz barre egin nahi dugu, krisiaz, munduaz … eskandalu finantzario, politiko eta moralak eta guzti.

Bizirik gaude, eta gure amen, amonen azalean jarri nahi dugu, bizitzan ahal izan dutena eta tokatu zaiena egin duten emakume horiek asko baitaukate oraindik esateko, dagoeneko geratzen ez zaien denboraren arnasa burugainean sentitzen dutelarik. Bizirik gaude, eta hau hasi besterik ez da egin.

#guerrillafemmes

Hurrengo ekitaldiak: