20 urte eman ditu Divina Pedreak bere jaioterrira itzuli gabe. 20 urte drag queen bihurtu eta Pedrin izateari utzi zionetik. 20 urte bere aitak, Pedrok, lantegi bateko sindikalista ohiak, etxetik bota zuenetik. Baina, gaur, Divina Pedrea herrira itzuliko da lehen mailako artista bihurtuta, jaiotzen ikusi zuen klub berean bere show handia aurkeztera. Edo hori uste du behintzat, Los Javisek film bat ekoitziko diotela amesten baitu berak…
Aita-semeak berriro aurrez-aurre jarriko dituen istorioa da, Alzheimerrak aitaren bizitza mugatu eta drag lanbideak semearena definitzen duen bizitza-unean. “Bidearen amaieran”, komedia kabaretero eta emozionala; korapiloz, umorez, musikaz, dantzaz betea… eta sentimenduz josia.
