Festa honetan, eguneko musika saio bat, DJ bat, pertsonaia xelebre bat, haren bi laguntzaile eta argazkilari bat presto ageri dira bertaratu berri diren lagunei ongietorria emateko. Hona-hemen Europa jolas-parkea; bertan, dibertsioa eta zoriontasuna bermatuta daude uneoro. Europan pil-pilean dagoen oker izendatutako errefuxiatuen krisia abiapuntu harturik, kaleko ikuskizun honek erabat gaitzesten ditu Europar Batasunaren migrazio politikak. Izan ere, irizpide ekonomikoak giza eskubideen gainetik gailentzen baitira.
Gezurrezko aktibismoen garaiotan, gizartearen patologia egozentrikoak etxeko sofaren erosotasunetik eta sare sozialetako kritika errazetatik eraikitzen dira. Hortaz eta antzerkia, dantza, musika eta irudien bitartez, ikuskizun honen helburua egungo muga eta harresien inguruko gogoeta sustatzea da.